Friday, January 30, 2015

എപ്പൊഴും തണലായ പൂമരങ്ങള്‍


ചില സൗഹൃദങ്ങള്‍
പഴയ
പാത്രങ്ങള്‍ പോലെയാണ്
തേഞ്ഞടര്‍ന്നു ഞണുങ്ങി
പാതകത്തിന് അടിയില്‍
കമിഴ്ന്ന്‍ ഒളിക്കും.

ചിലപ്പോള്‍
ചിലന്തികള്‍ക്ക് വല വരയ്ക്കാന്‍
എലികള്‍ക്കോ ,പറ്റയ്ക്കോ
മറഞ്ഞിരിക്കാന്‍
പഴയ പാത്രം തേടിവരുന്നവന്‍റെ
ശബ്ദം കേള്‍ക്കും വരെയും
അവിടെത്തന്നെ ഉണ്ടാവും.

ചില സൗഹൃദങ്ങള്‍
അട്ടകളെ പോലെയാണ്
ഹൃദയത്തില്‍ തന്നെ
കടിച്ചിരിക്കുന്നതിനാല്‍
എന്തു സ്നേഹം എന്ന് നാം
ആനന്ദിക്കും
അവസാന തുള്ളി
ചോരയും
തീര്‍ന്നേ
വിട്ടു പോകൂ.

ചില സൗഹൃദങ്ങള്‍
മഴപോലെയാണ്
വല്ലപ്പോഴും വരുമ്പോഴും
ആര്‍ദ്രത മാത്രം
ശേഷിപ്പിക്കുന്നവ .

ചില സൗഹൃദങ്ങള്‍
ലഹരി പോലെയാണ്
മാന്ത്രിക തൂവല്‍ തൊട്ട്
മായികമായ
ഒരു ലോകത്തേക്ക്
പറത്തി വിടുന്നവ.

ചില സൗഹൃദങ്ങള്‍ മാത്രം
ഹൃദയ താളം പോലെ!

മരണം വരെയും
ഒപ്പം ഉണ്ടാവുന്നവ
മരണ ശേഷവും
മറഞ്ഞു പോകാത്തവ.

കണ്ണടയും കാഴ്ചയും
ആകുന്നവ
വാക്കും കേഴ്വിയും
ആകുന്നവ
ശ്വാസവും ഗന്ധവും
ആകുന്നവ.

എപ്പൊഴും തണലായ പൂമരങ്ങള്‍ !

Tuesday, July 22, 2014

പുതിയ കവിത മലയാള സമീക്ഷയില്‍


ഇതാ ഇതുവഴി http://www.malayalasameeksha.com/2014/07/blog-post_8832.html

Thursday, July 10, 2014

രണ്ട് ഫുട്ബോള്‍ കവിതകള്‍


ഒന്ന്
******
മെസ്സി കുലുക്കിയ വല
******************************
മെസ്സി കുലുക്കിയ
വല പറഞ്ഞു
ഇപ്പൊ
കുലുങ്ങി കുലുങ്ങി എന്‍റെ
ചരടൊക്കെ
പൊട്ടിയേനെ
ഗോളുകൊണ്ട്
തുളഞ്ഞവള്‍ എന്ന്
പേര് കേട്ടേനെ!

രണ്ട്
******
റഫറി
*******
എത്ര വേഗത്തില്‍
വേണേലും
എത്ര ദൂരത്തില്‍
വേണേലും
കൂടെ
ഓടിക്കോ.
പക്ഷെ
പന്തേ തൊടണേല്‍
ഇച്ചിരി പുളിക്കും .

റഫറി
ഓര്‍ത്തു
കുളിരു കോരി
മണ്ടന്മാര്‍
ഞാനെങ്ങാനം ആരുന്നേല്‍
ഇപ്പം
രണ്ട് വലേലും
ഗോളു കൊണ്ടു
നിറഞ്ഞേനേം!

Friday, June 27, 2014

നിശ്ശബ്ദത

നിശ്ശബ്ദത
നിശ്ചലതയോടു
ചോദിച്ചു
നിനക്ക്
എങ്ങനെ
നിശ്ചലമാകാൻ
കഴിയുന്നു?

നിശ്ചലത
നിശ്ശബ്ദതയോടു
ചോദിച്ചു
നിനക്കെങ്ങനെ
നിശ്ശബ്ദമാകാൻ
കഴിയുന്നു?

അരികില്‍
നിശ്ശബ്ദയായി
ഇരുന്ന
ഒരു ചീവീട്
മനസ്സില്‍
പറഞ്ഞു
കഷ്ടം!

Saturday, January 19, 2013

പ്രാര്‍ത്ഥന

ഒരു
ഒന്നാം തിയതിയും
ഞായറാഴ്ച  ആകാതിരിക്കട്ടെ

Sunday, September 16, 2012

പുസ്തകങ്ങള്‍

                                                         എന്‍റെ ആദ്യ പുസ്തകം





                                                         എന്‍റെ രണ്ടാം പുസ്തകം



                      രണ്ടും പ്രസിദ്ധീകരിച്ചത് യുവമേള പബ്ലിക്കേഷന്‍ കൊല്ലം .3